Muaji janar pritet të jetë edhe nisja e procesit të rindërtimit të shtëpive të shkatërruara nga tërmeti i 26 nëntorit. Ka qenë drejtuesi i fondacionit “Fundjavë Ndryshe” Arbër Hajdari, i cili ka bërë me dije se puna do të nisë gjatë javës së ardhshme. Në një intervistë për “Zërin e Amerikës”, ndër të tjera ai denoncoi edhe tentativat e disa individëve për të bërë biznes me tërmetin.
“Ka pasur një presion jashtëzakonisht të madh në ditën kur unë prezantova këtë projekt (ndërtimi me banesa të parafabrikuara) për shkak se sigurisht që ka njerëz që duan të bëjnë biznes. Dhe kam rezistuar fort sepse ky është një projekt që i duhet Shqipërisë, që i duhet njerëzve.
Ka pasur njerëz që kanë dashur të përfitojnë nga situata e tërmetit. Unë kam akuzuar edhe publikisht për këtë situatë, por shpresoj që situata do të jetë më e qartë në ditët në vijim, ku do të nisë edhe projekti konkret dhe besoj se do të dalin në pah të gjithë personat që kanë dashur të bëjnë biznes me tërmetin.”
Hajdari bëri me dije se besimi i njerëzve te fondacioni ka qenë shumë i madh. Kjo është reflektuar dhe në ndihmat e mbledhura.
“Vetëm në “Fundjavë Ndryshe” janë rreth 75 mijë donatorë nga e gjithë bota të cilët kanë kontribuar në shuma monetare për rindërtimin e banesave. Ne kemi grumbulluar rreth 1.7 milion euro ndihma materiale. Gjithashtu kemi grumbulluar edhe 2 milion dollarë në shumë parash.
Kemi bërë një koordinim edhe për të qenë sa më transparentë me njerëzit…do të jemi deri në fund të këtij procesi, hap pas hapi, në çdo banesë, për të shoqëruar edhe qindarkën e fundit drejt e në destinacion.”
Ndihma e ardhur për të prekurit nga tërmeti nuk ka qenë vetëm nga shqiptarët, por edhe kompani të mëdha botërore janë bërë pjesë. Hajdari tha se kanë bashkëpunuar me kompani si “Amazon” dhe “Philip Morris”, të cilat i kanë besuar donacionet e tyre fondacionit “Fundjavë Ndryshe”./ TIRANA TODAY
