I njohur si “vrasësi serial i Hollywood-it”, Michael Gargiulo, u dënua me vdekje pasi vrau dy gra dhe u përpoq të vriste një të tretë. Vendimi është marrë nga gjykatësi i Los Angelos, Larry Paul Fidler.
Rasti i 45-vjeçarit Gargiulo u bë pjesë e kronikës së zezë në median amerikane, pasi një nga viktimat, Ashley Ellerin, ishte një vajzë e cila po përgatitej të shkonte në takim me aktorin Ashton Kutcher. Ellerin humbi jetën pasi u godit 47 herë me thikë.
Viktima tjetër ishte Maria Bruno, 32-vjeç dhe nëna e katër fëmijëve. Gargiulo e vrau dhe më pas masakroi trupin e pajetë, duke krijuar terror te banorët.
Ndërkohë, Michel Murphy, ishte e vetmja që arriti të mbijetonte nga sulmi i tij. Pasi shpëtoi sulmit të Gargiulos, ajo ndihmoi hetuesit që të zgjidhnin dhe dy rastet e tjerë, pasi ajo ishte edhe identifikuesja e tij, që çoi më pas në arrestimin e tij.
Pas dhënies së vendimit, Gargiulo u shpreh se ishte dënuar me vdekje në mënyrë të padrejtë dhe të pajustifikueshme. Ai shtoi se kishte dashur të dëshmonte, por nuk e kishin lejuar. Ai u akuzua dhe në vitin 2011 në Ilinois për vrasjen në vitin 1993 të 18-vjeçares Trisia Pakasio. Babai i viktimës gjeti trupin e pajetë të vajzës në shkallët e banesës. Ajo ishte qëlluar me thikë 12 herë. Gargiulo, në atë kohë 17-vjeç, jetonte shumë pranë dhe fillimisht ishte i dyshuar, por nuk u akuzua deri në vitin 2003 pas një analize ADN-je.
