Skënderbeu vazhdon betejën ligjore në UEFA për dënimin 10-vjeçar që ka marrë nga Komisioni i Disiplinës nën akuzën e trukimit të ndeshjeve. Ditën e sotme në zyrat e UEFA-s në Nion të Zvicrës kanë dëshmuar Sabian Lilaj dhe Bledi Shkëmbi, dy futbollistë të cilët kanë hedhur poshtë në mënyrë kategorike që Skënderbeu të jetë përfshirë në trukimin dhe manipulimin e mbi 50 ndeshjeve.
Burime për ‘Sport News’ bëjmë me dije se në të njëjtën linje me Lilaj dhe Shkëmbin ka qenë edhe Bakari Nimaga i cili për tre minuta ka dhënë dëshminë e tij në një lidhje “live” me video konferencë. Askush nga klubi i Skënderbeu nuk e pranon një fakt të tillë dhe dëshmitë e tre futbollistëve janë në sinkron me atë që drejtuesit e klubit korçarë e kanë theksuar që në momentet e para.
Edhe vetë UEFA duket më e lëkundur pas vendimit të parë të marrë nga Disiplina pasi dosja prej 106 faqesh është reduktuar në 24. Pas dëgjoi përfaqësuesit e klubit të Skënderbeut, Komisioni i Apelit pritet të dalë në një përfundim në ditët në vijim. Pavarësisht dëshmive dhe mungesës së provave konkrete, drejtuesit e Skënderbeut dhe përfaqësuesit ligjore të tyre nuk presin që vendimi të jetë i ndryshëm, të paktën kështu flasin precedentët e shkuar.
