Pas dënimit me burgim të përjetshëm të Radovan Karaxhiç, vjen reagimi i presidentit Ilir Meta.
Ai e quan këtë vendim një “drejtësi të vonuar”, por edhe një thirrje që të mos harrojmë urrejtjen etnike e genocidin që buron prej saj dhe një mësim për të punuar pa u lodhur për bashkëjetesën e harmoninë mes popujve, kombeve dhe etnive në Ballkan.
“Vendimi i sotëm i Tribunalit të Hagës, që dënoi Radovan Karaxhiçin, është jo vetëm një drejtësi e vonuar, por mbi të gjitha një thirrje që mos të harrojmë urrejtjen etnike e genocidin që buron prej saj dhe një mësim për të punuar pa u lodhur për bashkëjetesën e harmoninë mes popujve, kombeve dhe etnive në Ballkan”, shkruan presidenti në Facebook.
73-vjeçari Karaxhiç u dënua me 40 vite burg në vitin 2016 nga tribunalja e Hagës, por ai e apeloi vendimin, duke pretenduar se ishte i bazuar në “thashetheme”.
Karaxhiç u shpall fajtor për 10 akuza te gjenocidit, krime lufte dhe mizori të tjera, përfshirë planifikimin e masakrës së Srebrenicës në korrik të vitit 1995, ku u vranë rreth 8000 myslimanë, një nga barbarizmat më të mëdha që nga Lufta e Dytë Botërore.
Ai gjithashtu u shpall fajtor për udhëheqjen e një fushate spastrimi etnik që detyroi kroatët dhe myslimanët të largoheshin nga zona serbe të Bosnjës gjatë luftës së Bosnjës 1992-1995 – duke përfshirë rrethimin e Sarajevës që rezultoi me vdekjen e më shumë se 10,000 njerëzve, rreth gjysma e të cilëve ishin civilë./ Tirana Today
