Qendrat për Kontrollin dhe Parandalimin e Sëmundjeve në Shtetet e Bashkuara të Amerikës (CDC), pritet të rekomandojnë që njerëzit plotësisht të vaksinuar të fillojnë të mbajnë maska përsëri brenda në vende me nivele të larta transmetimi të Covid-19, siç janë ambientet e mbyllura.
Zyrtarët federalë të shëndetësisë ende besojnë se individët plotësisht të vaksinuar përfaqësojnë një sasi shumë të vogël të transmetimit. Disa njerëz të vaksinuar mund të mbartin nivele më të larta të virusit sesa ishte kuptuar më parë dhe potencialisht ta transmetonin atë tek të tjerët, thanë ata, shkruan CNBC.
Udhëzimi i azhurnuar vjen përpara sezonit të vjeshtës, kur varianti shumë ngjitës i deltës pritet të shkaktojë një rritje tjetër të rasteve të reja të koronavirusit dhe shumë punëdhënës të mëdhenj planifikojnë t’i sjellin punëtorët përsëri në zyrë.
Në mes të muajit maj, CDC tha që njerëzit plotësisht të vaksinuar nuk kishin nevojë të mbanin maska në shumicën e mjediseve, qoftë brenda ose jashtë.
Ekspertët e shëndetit janë të shqetësuar se varianti Delta, tashmë forma mbizotëruese e sëmundjes në SHBA, po godet shtetet me shkallë të ulët të vaksinimit. Këto shtete tani janë të detyruara të rivendosin rregullat e maskave, kufijtë e kapacitetit dhe masa të tjera të shëndetit publik që ata i kanë mbështetur kryesisht në muajt e fundit.
