Incidenti i natës së mbrëmshme pranë burgut 313 në Tiranë, shkaktoi kaos në një nga zonat më të frekuentuara në kryeqytet, pranë rrugës “Jordan Misja”. Më herët u njoftua se dy të rinj thyen postbllokun e policisë, dhe tentuan të ikin duke u arratisur edhe në këmbë.
Në tentativë për t’i ikur policisë, shtetasit G. Koçi në timon dhe E. Kodra si pasagjer, nuk i janë bindur urdhrit të policisë për të ndaluar, ndërsa qarkullonin me një fuoristradë “Tuareg”. Në tentativë për tu larguar, ata kanë përplasur disa automjete dhe dy motorë policie.
Motorë të policisë të rrëzuara, dy makina të përplasura ‘kokë më kokë’ me njëra-tjetrën, policia e alarmuar, është gjithçka ka ndodhur pas ndjekjes së dy të rinjve, si nëpër filma.
Deklarata e policisë
“Policia e Tiranës vijon zbatimin e planit të masave, për parandalimin, evidentimin dhe goditjen e elementëve me precedent kriminal në fushën e armëmbajtjes pa leje, të trafikut të lëndëve narkotike, atyre në fushën e vjedhjes, për drejtuesit e mjeteve që bëjnë gara shpejtësie apo xhirojnë gomat në ambiente publike, të atyre që drejtojnë mjetet në gjendje të dehur, etj.
Në këtë kuadër, mbrëmjen e djeshme, rreth orës 23:20, Policia e Tiranës ka evidentuar dhe goditur një tjetër rast të armëmbajtjes pa leje dhe mosbindjes së punonjësve të policisë për të ndaluar, ku falë punës së mirëorganizuar dhe ndjekjes nga ana e shërbimeve të policisë, kapen dhe arrestohen drejtuesi i mjetit dhe pasagjeri.
Gjatë ndjekjes nga policia të automjetit ku udhëtonin dy shtetasit që mbanin armë zjarri me vete, drejtuesi i automjetit ka përplasur duke u shkaktuar dëme materiale 4 automjeteve të tjera.
Policia gjeti dhe sekuestroi dy armë zjarri të tipit “pistoletë”, të cilat u hodhën në një oborr banese dhe në një rrugicë nga drejtuesi i mjetit dhe pasagjeri.
Nga Specialistët për Hetimin e Krimeve të Komisariatit të Policisë Nr.3, në bashkëpunim me Specialistët për Hetimin e Krimeve ndaj jetës dhe pronës në D.V. P., Tiranë, u bë arrestimi në flagrancë i shtetasve :
Gentjan Koçi, 25-vjeç, banues në Tiranë dhe Ervin Kodra, 33-vjeç, banues në Tiranë.
Këta shtetas, në rrugën “Jordan Misja”, duke lëvizur me mjetin tip “Tuareg”, i cili drejtohej nga shtetasi Gentjan Koçiu dhe pasagjer shtetasi Ervin Kodra, nuk i janë bindur shenjës së ndalimit të shërbimit të “Forcës së Posaçme Shigjeta”, pasi mbanin sende të kundraligjshme në mjet (2 armë zjarri pa leje), por janë larguar me shpejtësi me mjet, duke u bërë burim aksidenti, e duke u përplasur edhe me 4 mjete të tjera në rrugë, duke iu shkaktuar dëme materiale dhe pas ndjekjes nga ana e shërbimeve të policisë, këta shtetas janë ndaluar në rrugicat e rrugës “Jordan Misja”, ku dhe u bë arrestimi në flagrancë i tyre.
Gjithashtu nga ana e shërbimeve të policisë janë gjetur dhe sekuestruar në cilësinë e provës materiale 2 armë zjarri të llojit “pistoletë”, të hedhura prej shtetasve të lartpërmendur pasi braktisën mjetin, në oborrin e një banese dhe në një rrugicë”.
Materialet iu referuan Prokurorisë së Rrethit Gjyqësor Tiranë, në ngarkim të shtetasve të lartpërmendur, për veprat penale “Prodhim dhe mbajtja pa leje e armëve dhe municionit luftarak”, “Shkatërrim prone” dhe “Mosbindja ndaj urdhërit të punonjësit të Policisë”.
