Presidenca ka hedhur poshtë lajmin e skadimit të afatit për akreditimin e Sandër Lleshit, si ministër i Brendshëm.
Ky sqarim vjen nga burime pranë Presidencës, pas lajmit të publikuar nga VOA, që shkruante se “Skadon afati, Meta nuk ka vendim për Sandër Lleshin”.
Sipas reagimit, sqarohet se në respekt të ligjit “Afati i presidentit për dekretin skadon në fundin e ditës së shtatë, që është sot në orën 24:00, në mesnatë”.
Duket se brenda ditës së sotme do të njihemi me një vendim të presidentit Meta, lidhur me dekretimin e ministrit të ri të Brendshëm.
Kujtojmë se Meta firmosi menjëherë dekretin e dorëheqjes së Xhafajt, ndërsa ka mbajtur peng deri më tani atë të Lleshit, propozim ky i kryeministrit Rama. Mbrëmë, Meta deklaroi se vendimi për dekretin është kurajoz dhe se nuk mund të hedhë një firmë formale.
