Deklaroi se ka shitur votën, shoqërohet në polici qytetari nga Lezha

Një qytetar është shoqëruar në polici ditën e sotme për shkak se deklaroi se ka shitur votat e familjarëve në këmbim të 200 mijë lekëve.

Përmes një video që fillimisht u publikua nga Syri.tv dhe më pas u bë virale, qytetari pretendonte se votat ishin blerë për PS dhe lekët u ishin shpërndarë me furgona policie.

“Menjëherë pas shfaqjeve të pamjeve filmike në rrjete sociale të një qytetari nga Lezha, i cili ka deklaruar se “ka marrë para në këmbim të votës dhe se këto para i ka marrë nga policia”, por pa specifikuar personat dhe vendin ku i ka marrë këto para, forcat e Drejtorisë Vendore të Policisë Lezhë kanë bërë shoqërimin në polici të shtetasit G.P”, informoi policia.

Uniformat blu kanë kryer verifikime në lidhje me identifikimin e shtetasve të përfshirë në këto pamje filmike.

Shtetasi G.P i shfaqur në video sapo ishte kthyer nga puna në Malin e Zi, ku ishte si punëtor sezonal.