Dy efektivë të komisariatit të Lezhës janë grushtuar me njëri-tjetrin brenda ambienteve të këtij institucioni pikërisht në ditën kur Policia e Shtetit shënon 105-vjetorin e krijimit të saj.
Si për ta shenjur këtë ditë si metaforë të degradimit të policisë dhe gjendjes së komisariateve nëpër rrethet e vendit kanë menduar dy efektivët e Patrullës së Përgjithshme në Policinë e Lezhës.
Ndërkaq sipas informacioneve zyrtare të Shërbimit të Çështjeve të Brendshme, oficeri i Patrullës së përgjithshme N.Sh., ka qëlluar me grushte punonjësin e kësaj patrulle M.M., ndërsa ky i fundit është kundërpërgjigjur. Për të dy punonjësit është marrë masa e pezullimit nga detyra, ndërsa nuk bëhen me dije shkaqet e konfliktit.
Policia e cila duhet të përbëjë shembull për qytetarët dhe komunitetin e zonës ku veprojnë, përkundrazi shndërrohet në një arenë boksi mes kolegësh. Ndërsa tregon edhe një herë gjendjen e mjeruar të këtij sektori me të cilin kryeministri Rama krenohet me aq bujë duke e renditur edhe si institucionin me besueshmërinë më të lartë.
Shto këtu faktin e raporteve që vijnë nga drejtësia italiane, e cila e cilëson policinë shqiptare si pjesëtare të trafikut të drogës.
Ndërsa tre drejtues të lartë të policisë gjenden sot në arrati dhe qershia mbi tortë e këtij degradimi është edhe kupola e vetë Policisë së Shtetit, për të cilin ministri i Brendshëm Xhafaj u përpoq të mbulonte “diellin me shoshë” teksa shkarkoi pak ditë më parë, Haki Çakon, të besuarin e kryeministrit Rama dhe të ish-ministrit të Brendshëm Saimir Tahiri.
