Stërvitja “Defender 21” ka nxjerrë në pah ndarjen e thellë jo vetëm mes Presidentit Meta dhe Kryeministrit Rama, por edhe mes Presidentit Meta dhe ambasadores amerikane në Tiranë, Yuri Kim. Kjo “situatë e ngrirë” është vënë re sot në Sheshin ‘Nën Tereza”, ku u pa një performancë e trupave amerikane, ku mungoi një takim i përbashkët apo foto mes tyre. Fillimisht zonja Kim ka zgjedhur të mos qëndrojë e ulur në çastet e ardhjes së Metës, duke shmangur kështu një takim paraprak. Krejt ndryshe ndodhi me afrimin e Kryeminsitrit Rama, teksa Yuri Kim, në atë moment e ulur në rradhën e parë, u ngrit për shtrëngim duarsh me të dhe me ministrin e Mbrojtjes, z. Peleshi.
Duket se edhe protokolli ishte “kujdesur” që mes Ramës e Metës të ishte korridori mes rradhëve të karrigeve, duke i dhënë kështu mundësi “dëshirës” së përbashkët të Metës, Ramës e Kim të mos kishin asnjë fotografi të përbashkët, siç ka ndodhur rëndom në takime të ngjashme.
“Ndarja” edhe në fjalim
Si Meta ashtu edhe Rama kanë shmangur njëri-tjetrin edhe në fjalimet e mbajtura në sheshin “Nënë Tereza”. Ndërkohë, kryeministri Edi Rama ka zgjedhur pikërisht ditën e hapur të ‘Defender 21’ që mbahet në Tiranë, për të vlerësuar me superlativa ambasadoren Yuri Kim. “Dua t’i bëj një falenderim të posaçëm përfaqësueses së qeverisë së SHBA-ve në vendin tonë, ambasadores Yuri Kim, e cila i ka dhënë një cilësi tjetër marrëdhënieve mes dy vendeve, në mbështetje të kërkesave dhe nevojave të vendit tonë, qoftë në kapacitetet ushtarake, qoftë në ato të drejtësisë”, tha Rama në fjalën e tij përshëndetëse. Ky veçim përshëndetës për zonjën Kim dukej edhe si një përgjigje ndaj vendimit të Sekretarit Amerikan të Shetit, z, Blinken, për të shpallur “non grata” ish Kryeministrin Berisha. Vetë Rama nuk ka dhënë asnjë deklaratë lidhur me vendimin e Blinken, që në emër të Departamentit Amerikan të Shtetit, shpalli Berishën dhe familjen e tij “non grata”.
Ndërkaq, Kryeminsitri Rama ndërpreu edhe trasnemtimin në faqen e tij në rrjetin facebook fjalimin e Presidentit Meta, ndërkohë që ky i fundit e trasnemtoi të gjithë ceremoninë. Nga ana e tij, Presidenti Meta shprehu falenderime për NATO-n dhe SHBA-të, por nuk përmendi aspak ambasadoren Kim, të pranishme në takim. Megjithatës, mes Presidentit Meta dhe ambasadores Yuri Kim kishte në fund një shtrëngim duarsh, edhe pse situata mbetet e tensionuar, pasi kreu i shteti e akuzoi disa ditë më parë diplomaten amerikane për ndërhyrje në punët e brendshme./ Tirana Today
