Ambasada amerikane në Tiranë ka shpjeguar vendimin e SHBA-ve mbi dëbimin e diplomatëve rusë, ku kjo e fundit akuzohet për helmimin e ish-spiunit rus në Britaninë e Madhe.
Përmes një statusi në ‘Facebook’, ambasada ka shpërndarë një pjesë të qëndrimit të Shtëpisë së Bardhë lidhur me kërcënimet e Rusisë mbi përdorimin e armëve kimike në territorin e Mbretërisë së Bashkuar.
“Shtetet e Bashkuara e kanë ndërmarrë këtë masë në bashkëpunim me aleatët tanë në NATO dhe partnerët tanë kudo në botë, në përgjigje ndaj përdorimit të armëve kimike të nivelit ushtarak nga Rusia në territorin e Mbretërisë së Bashkuar, veprimi më i fundit në vazhdën e veprimeve të saj destabilizuese në mbarë botën”, shkruhet në postimin e ambasadës marrë nga deklarata e bërë nga Sekretari i Shtypit në Shtëpinë e Bardhë.
Rikujtojmë se SHBA urdhëroi dëbimin e 60 diplomatëve rusë, ndërsa iu la në dispozicion një kohë të shkurtër për t’u larguar nga toka amerikane. Ndërkohë Gjermania dhe Franca kanë vendosur dëbimin e 4 diplomatëve rusë.
Ashtu si SHBA, edhe Shqipëria shpalli nongrata 2 diplomatë. Ndërkohë nuk ka ende një qëndrim nga ana e opozitës, konkretisht liderit të saj Lulzim Basha, i cili është akuzuar në media për lobimin e figurës së tij në SHBA nga biznesmenë rusë.
Lidhjet e mundshme e Partisë Demokratike me Rusinë është një debat i nxehtë në opinionin publik. Kjo nisi menjëherë pas shkrimit investigativ të revistës amerikane “Mother Jones”, e cila shkruante se Basha është finanacuar nga Rusia. Ndërkohë ka qenë vetë kryeprokurorja, Arta Marku, e cila deklaroi ditë më parë se tashmë është një dosje e hapur në prokurori, ndërsa prokurorët po punojnë në lidhje me të vërtetën e lobimit të PD-së në SHBA.
Presidenti i Këshillit Evropian Donald Tusk deklaroi se 14 shtete të BE-së kanë dëbuar nga vendet e tyre diplomatët rusë, pasi blloku e konsideron përgjegjëse Rusinë për helmimin e ish-spiunit rus, Sergei Skripal dhe vajzës së tij Yulia, në Salisbury në Britani të Madhe.
Ndërkohë edhe Shqipëria përmes kryeministrit Edi Rama paralajmëroi dëbimin e diplomatëve rusë. “Qeveria do të vendosë për dëbimin e disa shtetasve rusë. Ky është një veprim i koordinuar me vendet e NATO-s. Do dëbojmë rusët që kanë shkelur interesat kombëtare”, mësohet të ketë thënë Rama.
Ndërsa pak minuta më vonë ishte ministri për Evropën dhe Punët e Jashtme, Ditmir Bushati, i cili dërgoi porosinë e Ramës për dy zyrtarë rusë, të cilët duhet të lënë sa më parë tokën shqiptare.
Kjo tregon edhe njëherë se Shqipëria është në një frymë me vendet e tjera të BE-së si dhe Shtetet e Bashkuara të Amerikës sa i takon qasjes diplomatike ndaj Rusisë. TIRANA TODAY
