Gjatë fjalës së marrë në takimin informal në Durrës mes kryeministrave të Ballkanit, kryeministri i Kosovës, Ramush Haradinaj, u shpreh kundër ndryshimit të kufijve në Ballkan, duke iu referuar debatit për korrigjimin e kufijve mes Kosovës dhe Serbisë.
Po kështu, ai i mëshoi faktit se duhet të respektohen kufijtë ekzistues.
“Kosova i ka kufijtë e vetë, ne i respektojmë kufijtë që kemi”, u shpreh Haradinaj.
Kryeministri i Kosovës apeloi gjithashtu që BE t’i heqë vizat për lëvizjen e lirë të qytetarëve.
“Kemi ende vështirësi kur qytetarët tanë kalojnë në Serbi, kur kalojnë në Bosnje”, tha kryeministri Haradinaj, duke theksuar se më lehtësi ka kalimi drejt Shqipërisë.
