Kombëtarja shqiptare momentin më të mirë në histori e ka arritur në kohën kur drejtoheshe nga trajneri italian, Gianni De Biasi. Por pas largimit nga pankina kuqezi eksperienca e teknikut vazhdoi në Spanjë ku kaloi një periudhë aspak të mirë. Në një intervistë të dhënë së fundmi De Biasi ka folur mbi eksperiencë që pati në gadishullin iberik dhe ecurinë e skuadrave italiane në Champions League.
“As Roma dhe as Juventusi nuk do të kualifikohen. Ekziston një diferencë e madhe teknike kundrejt Barcelonës dhe Real Madridit”, u shpreh ish-trajneri i Kombëtares Shqiptare, para sfidave të kthimit ta skuadrave italiane në çerekfinale të Ligës së Kampionëve. Për De Biasin ka një hendek të madh midis futbollit italian dhe kampionateve të tjera europiane.
“Të tjerët janë rritur. Kampionët nuk preferojnë më skuadrat italiane. Dikur ia lejonim vetes të bënim investime të mëdha, ndoshta pa i menduar mirë, me rrezikun e asaj që bëri Parma. Jashtë Italisë, vetëm Juventus ia ka dalë të shkojë deri në fund. Të përballesh me një realitet tjetër, më superior, bëhet shumë më e vështirë. Tek Juventus, janë treguar të zotë në investime dhe në shitjen e futbollistëve në momentin e duhur. Kompeticionet ndërkombëtare janë bërë shumë të vështira dhe në fund të fundit, vjen një tjetër arab dhe merr skuadrën që do”, tha De Biasi.
61-vjeçari e sheh zgjidhjen për futbollin italian te përkrahja e futbollistëve të rinj, pasi nuk kanë frikën se mund të gabojnë, ndërsa sa i përket të ardhmes së tij, ish-tekniku kuqezi u shpreh:
“Pres të më vijë një tjetër mundësi. Jam shumë i hapur ndaj çdo oferte, mirëpo gabova që shkova në Spanjë te Alaves. Ishte një zgjedhje emocionale dhe duke parë karrierën time, duhet të kisha vepruar më me racionalitet”.
