Atëherë kur u duk se gjithçka i kishte dalë jashtë kontrollit, 60-vjeçari italian gjeti forcën për t’iu kundërpërgjigjur të gjithëve, në fillim me rezultatin e punës së tij dhe të lojtarëve, e në fund me deklaratën ndaj kritikëve.
“Për sa u përket kritikave, kur janë konstruktive dhe për lojën më pëlqejnë. Por kur vijnë nga njerëz që shohin vetëm rezultatin, nuk më pëlqejnë shumë”, tha De Biasi.
Një përgjigje ndaj atyre që e menduan të dorëzuar përballë nivelit jo shumë të lartë të kuqezinjve. Por në momente të vështira, Gianni De Biasi ka ditur gjithmonë të reagojë, duke treguar aftësinë e tij më të madhe, motivimin e kësaj skuadre pa yje, por një grupi që di të luajë futboll.
Një tjetër bast i fituar i De Biasit sa i përket sulmit dhe në tërësi për ndeshjen krejtësisht të dominuar, që nga përqindja e mbajtjes së topit, që ishte 60%, deri te numri 21 i goditjeve në portën kundërshtare.
De Biasi i pyetur dje nga gazetari Pano Xhixho se “Sa herë që kombëtarja fiton është meritë e futbollistëve dhe kur humbet është përgjegjësi e trajnerit. De Biasi u përgjigj që është e vërtetë që sa herë ekipi fiton është meritë e lojtarëve sepse janë ata që luajnë në fushë, janë ata që shënojnë dhe ruajnë portën që të mos pësojmë. Ata luajnë në ekip. Sigurisht kur humbasim De Biasi tha se është përgjegjësia më e madhe e trajnerit. Sepse është ai që përcakton se cilët lojtarë do të luajnë dhe ai që vendos mbi bazën e skemave që do të luhen.
Ndër të tjera De Biasi tha se “Na shërbeu shumë fakti që qëndruam dy javë bashkë për të gjetur motivimin e duhur të këtyre lojtarëve, që e çuan këtë skuadër në Europian.”
Mesa duket ky ishte çelësi i suksesit për kuqezinjtë, pas krizës së ndeshjeve të fundit që ishin finalizuar me humbjen e Luksemburgut. Fitorja 3-0 ndaj Izraelit bëri të harrohej gjithçka shumë shpejt dhe paralelisht na riktheu në kujtesë kombëtaren më të mirë të viteve të fundit, atë të Europianit.
