SHBA dënon ashpër sulmet e dhunshme ndaj anëtarëve të parlamentit të Maqedonisë, pas zgjedhjes së Talat Xhaferit si kryeparlamentar. Nga DASH thonë se kryeparlamentari i ri do të ketë mbështetjen e tyre të plotë për t’i ndihmuar Maqedonisë të eci përpara në rrugën evropiane.
Shtetet e Bashkuara, gjithashtu, apelojnë tek të gjitha partitë që të ruajnë qetësinë dhe t’i respektojnë ligjet dhe proceset demokratike në Maqedoni.
“Dhuna nuk ka vend në proceset demokratike. Shprehim keqardhjen tonë për të gjithë të lënduarit dhe familjet e tyre. Shtetet e Bashkuara i bëjnë thirrje autoriteteve të Maqedonisë për të bërë të mundur sigurinë e të gjithë anëtarëve të Parlamentit, të hetojnë me detaje sulmin dhe të kërkohet llogari nga ata që shkaktuan dhunën”, thuhet në qëndrimin e DASH.
