Vjen reagimi i Unionit të Gazetarëve Shqiptarë lidhur me incidentin në Gjykatën e Vlorës, ku të arrestuarit Romario Alirja dhe biznesmeni Arben Veliko kërcënuan gazetarët dhe operatorët.
Dy personat e arrestuar inskenuan atentatin në Vlorë për të përfituar azil në një nga vendet e Bashkimit Evropian. Ndërkohë, ne videon e publikuar nga salla e gjyqit, dëgjohet teksa biznesi i drejtohet gazetarëve dhe opoeratorëve me fjalët: “Hë se jua tregoj unë kur të dal jashtë”.
Unioni i Gazetarëve, në reagimin e tij thekson se çdo lloj kërcënimi, në çfarëdo lloj forme do të trajtohet nëpërmjet të gjitha hallkave përkatëse dhe do të merren masat e nevojshme, ndërsa shton se asnjë lloj kërcënimi nuk e kthen pas misionin për të pasqyruar të vërtetën.
“Unioni i Gazetarëve, dënon ashpër kërcënimin e bërë në drejtim të operatorëve të qytetit të Vlorës nga i akuzuari Arben Veliko në masën e sotme të arrestit. Unioni i Gazetarëve deklaron se asnjë lloj kërcënimi nuk e kthen pas misionin për të pasqyruar të vërtetën nga gazetarët dhe operatorët e qytetit të Vlorës,sado i ëmbël apo i hidhur qoftë ai. Ne deklarojmë sot se çdo lloj kërcënimi në cfarëdo lloj forme do të trajtohet nëpërmjet të gjitha hallkave përkatëse dhe do të merren masat e nevojshme. Sot gazetarët dhe operatorët janë më të bashkuar se kurrë dhe nuk lejojnë të cënohet asnjë gazetar apo operator nga individ, kriminel, politikan, punojës administrate dhe kushdo tjetër. Ne jemi këtu për ti shërbyer qytetit dhe qytetarëve të Vlorës”, thuhet në reagimin e UGSH.
