Ilir Daja në konferencën për shtyp të mbajtur para ndeshjes që do të zhvillohet ditën e nesërme përballë Partizanit të Beogradit, është shprehur se ekipi ka shanse që ta fitojë këtë ndeshje. Skuadra është përgatitur mjaft mirë për këtë sfidë dhe do të tentojë të marrë më të mirën. Kemi disa probleme me disa lojtarë të cilët nuk janë në formën e tyre më të mirë, por shpresojmë që nuk do të na hapin probleme. Ne do ti lemë jashtë emocionet e kësaj ndeshje dhe do të fokusohemi tek futbolli, shpresojmë që të na kthejnë atë respekt që u dhamë në “Elbasan Arena”. Skënderbeu do të tentojë fitoren në këtë sfidë edhe pse është mjaft e vështirë, pasi në rast fitoreje shanset për të kaluar më tutje bëhen më të mëdha.
Çfarë duhet të bëjë më shumë Skënderbeu për të bërë hapin e madh?
“Duke pasur mbështetjen e tifozëve, Partizani i Beogradit do kërkojë të fitojë ndeshjen. Kjo mund të jetë motivuese për ta, por mund të ketë edhe ngarkesë tek kundërshtari. Sepse një ekip që kërkon të fitojë patjetër, ka edhe emocione. Ne do kërkojmë të bëjmë lojën tonë si në ndeshjet e para në grupe. E njohim manovrën dhe lojën e kundërshtarit. Është e vështirë por jo e pamundur. Duhet të përpiqemi ta mbajmë vëmendjen te fusha e lojës, dhe jo në gjëra të tjera”
Ku ndryshon ndeshja e nesërme nga ajo që u zhvillua në Elbasan?
“Pa hyrë në detaje taktike, pasi nuk mund ti themi para ndeshjes, ajo që ndryshon është fakti që përshtatja e ekipit kundërshtar me ambientin është më e madhe. Ne na duhet të përballojmë vrullin e tyre, dhe shpresoj të kemi zgjedhur taktikat e duhura për të përballuar presionin e kundërshtarit.”
Si është gjendja e skuadrës? Çfarë i trembeni më shumë nesër?
“Kemi lojtarë që na vijnë nga dëmtimi, dhe nuk kanë gjendjen e tyre optimale. I trembemi këtij fakti, pasi në dy ndeshjet e fundit kemi bërë ndërrime të detyruara që në pjesën e parë, dhe kështu pjesa tjetër e ndeshjes duhet parë me shumë kujdes. Ky është një element që duhet ta kemi parasysh. Këta lojtarë nuk janë në gjendjen optimale më të mirë.”
E keni përgatitur skuadrën për presionet shtesë që mund të kenë në këtë fushë?
“Do thosha që duhet të fokusohemi tek aspekti sportiv. Kemi ardhur në Beograd për një ndeshje futbolli dhe për asgjë tjetër. Shpresoj që të na kthejnë atë lloj qetësie që i kemi dhënë Partizanit por dhe çdo skuadre në Elbasan. Nesër do fokusohemi vetëm tek futbolli, pasi çdo gjë tjetër nuk është e mirë as për ne as për kundërshtarin. Ne do shohim vetëm futbollin.”
