Ministri i Jashtëm serb, Ivica Daçiç, ka reaguar pas kritikave nga Michael Carpenter, që e akuzoi për ndërhyrje në politikën e brendshme amerikane. Shefi i diplomacisë serbe, Ivica Daçic, ka refuzuar kritikat nga Michael Carpenter, një ish-zyrtar i Departamentit amerikan të Mbrojtjes përgjegjës për Rusinë, Euroazinë dhe Ballkanin.
Carpenter tha se ministri i Jashtëm serb është duke ndërhyrë në politikën e brendshme amerikane duke u bërë thirrje serbëve të votojnë për Donald Trump në zgjedhjet e ardhshme në SHBA. Por, Daçiç ka një shpjegim. “Kur hebrenjtë votojnë për Trump-in, ajo nuk është ndërhyrje, kur shqiptarët votojnë për Clinton-in dhe Engelin. Nuk flas për Serbinë si shtet, flas për shtetasit amerikanë me prejardhje nga Serbia. Në Amerikë ashtu funksionojnë gjërat”, u shpreh Daçiç për të përditshmen serbe “Politika”, transmeton Lajmi.net. Diaspora serbe në SHBA duhet të organizohet, thotë Daçiç.
Carpenter, drejtor i “Penn Biden Centre”, që po ashtu ka shërbyer si këshilltar politik për zëvendëspresidentin amerikan Joe Biden, i ka thënë Zërit të Amerikës se ai beson që “Daçiçi po bën një gabim të madh” me këtë thirrje dhe se “mbështetja ndaj rrugës evropiane të Serbisë është një çështje mbi të cilën dy partitë në SHBA duhet të pajtohen”.
“Ministri i Jashtëm i Serbisë planifikon të ndërhyjë në politikën e brendshme amerikane duke mbledhur serbo-amerikanët për të mbështetur Trump-in më 2020.
Personalisht mendoj se ai po bën gabim të madh, dhe mbështetja amerikane për rrugën evropiane të Serbisë duhet të mbetet një çështje bipartizane”, ka shkruar Carpenter në profilin e tij në Twitter.
