Mali i Zi ka dërguar ushtrinë në kufi me Shqipërinë. Sipas raportimeve të para bëhet fjalë për kontrollin e fluksit të refugjatëve.
Ministria malazeze e Mbrojtjes bëri me dije se ushtarët janë dërguar në kalimin kufitar me Shqipërinë dhe se vija kufitare do të monitorohet nga patrullat e përziera.
“Qëllimi kryesor është parandalimi i kalimeve të paligjshme të kufirit shtetëror me Shqipërinë, por edhe aktivitete të tjera të paligjshme në kufi dhe në zonën kufitare”, thuhet në njoftimin e ministrisë malazeze.
Ushtria malazeze është vendosur në kufi me Shqipërinë nisur nga një i mëparshëm i Këshillit për Mbrojtjen dhe Sigurinë, i cili u miratua në mesin e muajit korrikut, kur u shqyrtua edhe raporti mbi fluksin e mundshëm të emigrantëve nga Greqia përmes Shqipërisë.
Ndërsa në Shqipëri është forcuar kontrolli kufitar, kur në datën 8 gusht janë ndaluar 16 emigrantë që ishin nisur prej Sirisë dhe Irakut për të kaluar drejt vendeve të BE. Në të njëjtën zonë në datën 3 gusht janë ndaluar dhe 14 të tjerë.
Pas shoqërimit në komisariat ku japin dëshminë emigrantët dërgohen në qendrën e azilit. Por shpesh dhe prej aty gjenden rrugët për të vazhduar tentativën e kalimit në vendet e unionit.
Për shkak të situatës së krijuar kreu departamentit për mbikqyrjen e kufirit shtetëror të Malit të Zi paralajmëroi në muajin maj ngritjen e një muri me tela. Por që tashmë duket se pengesë do të bëhet ushtria.
Edhe Komisioni Evropian ka marrë në diskutim situatën e krijuar. Për këtë qëllim u propozua dhe prezenca e 30 forcave të Fronteks në kufirin mes Shqipërisë dhe Greqisë.
Por dhe mes vendeve të BE debati ka mbetur i hapur. Ku propozimi për shpërndarjen e drejtë të azilkërkuesve dhe ideja e qëndrimit në vendin e parë mbeten molla e sherrit për shtetet më të mëdha të unionit .
