Ylli Manjani ka shprehur qëndrimin e tij në lidhje me zgjedhjet në vend, duke konfirmuar se është totalisht i zhgënjyer, pasi jo vetëm që nuk ka liri, por ato blehen.
Ai vendos pikat mbi “i”, duke i mëshuar fort faktit se koha tregon çdo gjë, dhe se tashmë është fakt se në vendin tonë, zgjedhjet janë të pandershme. Sipas tij, vullneti i votuesve devijohet dukshëm nga sistemi zgjedhor; nga shitja e votës; si dhe nga vjedhja e vullnetit në numërim.
Këtë ai e dëshmon me anë të një shembulli: “Në zgjedhjet e fundit, PS ka marrë 48% të votuesve, por zotëron 53-56% të vendeve në parlament. 5-8% devijim nga vullneti i votuesve! Sistem zgjedhor super mashtrues!”, shkruan ai ndër të tjera në Facebook.
Në analizën e tij, ndarë me të gjithë ndjekësit në rrjetin social, Manjani shkruan se zgjedhjet e vjetshme prodhuan prostitucionin elektoral më të madh të të gjitha kohërave. Por çfarë propozon ai për të gjetur një zgjidhje ideale? Ai citon se prostitucioni elektoral do të marrë zgjidhje kur votuesi të bëhet zgjedhës.
