Një adoleshent 15-vjeçar i cili ishte pjesë e një fisi të izoluar në afërsi të Amazonës, ka ndërruar jetë si pasojë e koronavirusit.
Vdekja e tij e befasishme nga COVID-19 ka ngritur shqetësime të shumta, pasi ekziston mundësia që 15-vjeçari të ketë infektuar persona të tjerë në fisin e tij.
Sipas Ministrisë së Shëndetësisë në Brazil, djaloshi nga Yanomami, përkatësisht nga fshati Rehebe, pranë lumit Uraricoera, vdiq të enjten.
Që më 3 Prill ai ka qenë nën kujdes intensiv në një spital në Boa Vista, në Roraima, dhe fatkeqësisht nuk mundi ta mposhte virusin misterioz.
Ministri i Shëndetësisë në Brazil konfirmoi se 15-vjeçari në testin e koronavirusit kishte rezultuar pozitiv.
Kujtojmë se komuniteti i ashtuquajtur “Yanomami” jeton në pyjet dhe malet e Brazilit verior.
Raportohet se virusi është shpërndarë në Yanomami përmes minatorëve që kanë hyrë në mënyrë të paligjshme.
Autoritetet zyrtare kanë bërë me dije se djaloshi ishte personi i tretë nga fiset e izoluara që ka vdekur nga COVID-19 në Brazil.
