Nga: William Haseltine “CNN”
Përkundër asaj që na thotë shkenca apo strategjia e dështuar mbi koronavirusin që ndoqi Suedia, njerëzit vazhdojnë të shpresojnë tek “imuniteti i tufës” si një strategji e mundshme për t’i dhënë fund pandemisë së Covid-19.
Gjatë një takimi elektoral, presidenti Donald Trump tha se virusi “do të zhduket” edhe pa një vaksinë.
“Ju do të zhvilloni imunitetin e tufës”, u tha ai mbështetësve të tij. Unë kam shkruar edhe më parë se sa e pamatur dhe joefektive është kjo mënyrë të menduari, dhe shumë ekspertë kanë rënë dakord.
Kjo strategjia do të shkaktonte një numër katastrofik vdekjesh në SHBA. Edhe Suedia, që pati një qasje të butë ndaj kufizimeve përballë përhapjes së koronavirusit, është ende larg pragut të ‘imunitetit të tufës’. Falë studiuesve që përdorin teknikat e sekuencave gjenomike, ne tani e dimë që njerëzit mund të infektohen sërish nga Covid-19 – një fakt që duhet të jetë “gozhda e fundit” në “arkivolin” e çdo shprese të keq-konceptuar mbi ‘imunitetin e tufës’.
Koronavirusët njerëzorë, nuk janë njohur në përgjithësi për shkak të imunitetit të tufës. Ata na kanë infektuar për dekada me radhe në mënyrë të ngjashme me mekanizmin e një ore, shumë prej nesh shumë herë gjatë jetës sonë. Deri kohët e fundit, ishte e paqartë nëse ky do të ishte rasti edhe për SARS-CoV-2.
Studimet mbi 2 pacientë të ri-infektuar me Covid-19, njëri në Hong Kong dhe tjetri në Shtetet e Bashkuara, i kanë dhënë përgjigje kësaj pyetje. E vetmja që mbetet ende pa përgjigje është se sa shpesh ndodh ri-infektimi.
Ajo që mund të hedhë dritë mbi këtë çështje, është një studim i përbashkët dhe shumëvjeçar i udhëhequr nga studiues nga Holanda dhe Kenia mbi koronavirusin që prek njerëzit NL63 (HCoV-NL63), një anëtar i familjes së koronavirusëve që nuk është vdekjeprurës, por që është endemik për popullatat në të gjithë botën.
Ashtu si koronavirusët e tjerë jovdekjeprurës, të cilët ka të ngjarë të na infektojnë të paktën një herë në jetën tonë, HCoV-NL63 shkakton atë që ne do ta quanim të ftohurën e zakonshme.
Tre zbulime kryesore nga ky studim, që u bë publik në vitin 2018, mund të ndihmojnë në një kuptim më të mirë mbi virusin Covid-19 SARS-CoV-2 dhe aftësinë e tij për të na ri-infektuar.
Studimi u krye në azilet e të moshuarve dhe spitalet në Qarkun Kilifi në Kenia, ku studiuesit gjurmuan qarkullimin e koronavirusëve të shumtë në të gjithë komunitetin për një periudhë prej 6 vjetësh. Gjetja e parë ishte se disa pacientë nuk u infektuan vetëm një herë, por dy herë.
Madje një person u prek 4 herë nga virusi. Kjo na tregon se si imuniteti ndaj HCoV-NL63 ishte jetëshkurtër, aq sa disa u infektuan brenda 3 muajsh. Gjetja e dytë e rëndësishme ishte fakti që një numër befasues pacientësh kishin ngarkesw më të larta virale pas ri-infektimit sesa gjatë infeksionit fillestar.
Për shumicën e njerëzve, si sasia e virusit në trupin e tyre, ashtu edhe ashpërsia e simptomave u ul nga njëri infeksion tek tjetri. Por për disa pacientë në studimin NL63, e vërtetë ishte e kundërta. Ky duket të jetë rasti i 25-vjeçarit në Nevada që u ri-infektua me Covid-19.
Në fakt, studiuesit në studimin NL63, theksuan se nivelet e larta të antitrupave tek disa pacientë në Kenia, rritën gjasat e infeksionit në vend se ta parandalonin ose zbutnin atë.
Ky përfundim sfidon pritshmërinë e përgjithshme, sipas së cilës një reagim i fortë imunitar, do të thotë një mbrojtje më e madhe nga ri-infektimi. Këto raste sugjerojnë që askush që preket nga një koronavirus, pavarësisht nga natyra e infeksionit të tyre fillestar, nuk është plotësisht i sigurt nga ri-infektimi.
Gjetja e tretë e rëndësishme është se në 6 vjet, imuniteti i tufës ndaj HCoV-NL63 nuk u arrit asnjëherë, dhe virusi vazhdoi të qarkullonte gjatë gjithë kohëzgjatjes së studimit. Koronavirusët njerëzorë endemikë, nuk janë aq ngjitës sa SARS-CoV-2, e megjithatë ata kanë infektuar njerëz në të gjithë botën për dekada dhe gjithmonë arrijnë që të rishfaqen.
Edhe nëse SARS-CoV-2 do të arrijë të bëhet një koronavirus endemik njerëzor si HCoV-NL63, ne nuk do të shpëtojmë nga rreziqet që paraqet ai për segmentet më të brishta të popullatës. Përveç rastit kur mund të kemi një vaksinë të përdorur gjerësisht që mund të na japë një mbrojtje, të cilën nuk na e garanton përgjigja jonë natyrale e sistemit imunitar.
Është në interesin tonë më të mirë ta pranojmë rrezikun e ri-infektimit – në vend se të mbajmë shpresë tek imuniteti i tufës – kur mendojmë mbi ndërhyrjet shkencore dhe shëndetësore publike që do të kërkohen në muajt dhe vitet e ardhshme.
Ne duhet të zhvendosim pjesën më të madhe të përpjekjeve tona në zhvillimin dhe shpërndarjen e barabartë të një vaksine, e cila të jetë jo vetëm e sigurt dhe efektive, por edhe që të shmangë mundësinë e ri-infektimit.
Ne duhet të dyfishojmë përpjekjet për të marrë masa bazuara në prova shkencore, derisa të kemi në dispozicion një vaksinë. Përndryshe, do të kalojë shumë kohë para se të kemi parë pjesën e fundit të pandemisë së Covid-19, dhe jo shumë kohë para se të prekemi nga një tjetër koronavirus vdekjeprurës.
Burimi i lajmit: https://edition.cnn.com/2020/09/18/opinions/reinfection-covid-19-prevention-herd-immunity-haseltine/index.html
Përshtatur nga TIRANA TODAY
