Hakerat po përdorin situatën me coronavirusin vdekjeprurës, duke shpërndarë artikuj në internet ku pretendohet se jepen informacione për rrezikshmërinë e virusit, si mund të shmanget apo shkaqet e përhapjes. Këto artikuj janë mashtrime, pasi përmbajnë kode të krijuara nga hakerat, për të vjedhur informacionin personal.
Ekspertët thonë se përveç artikujve, hakerat shpërndajnë edhe formate të tilla si PDF ose MP4. Nëse i klikoni këto materiale, qoftë në kompjuter apo celular, hakerat do të kenë mundësi të hyjnë në pajisjet tuaja, dhe të marrin të dhënat tuaja personale. Siç duket, edhe bota virtuale po përballet me një tjetër shqetësim.
Organizata Botërore e Shëndetësisë ka shpallur emergjencën globale, e ndërsa hakerat po e shfrytëzojnë mjaft mirë këtë rast.
Coronavirusi vdekjeprurës ka arritur shifra alarmante në Kinë. Autoritetet kineze deklarojnë se kanë marrë masat e duhura, pasi tashmë ata po kurojnë në spitalin me 1000 shtretër të ndërtuar brenda 48 orëve të gjithë pacientët e infektuar.
