Greqia ka marrë një tjetër masë për të përballuar situatën e pandemisë COVID. Të gjithë udhëtarët që do të futen në vendin fqinj nga data 18 dhjetor 2020 deri në 7 janar 2021 do të jenë të detyruar që të futen në karantinë 10-ditore.
Prestigjiozja greke, ‘Protothema’ shkruan se askush nuk përjashtohet nga masa. Njoftimi i karantinës paraprake dhjetë-ditore, megjithatë, ka shkaktuar një breshëri ndryshimesh në biletat e atyre që kishin planifikuar të ktheheshin pas të premtes të 18 dhjetorit.
Askush nuk përjashtohet nga masa paraprake e karantinës, edhe nëse një student kthehet për pushime nga jashtë, apo dikush që udhëton për biznes ose arsye të tjera.
Zëdhënësi i qeverisë greke, Stelios Petsas ka thënë gjatë ditës së sotme se ata që kthehen në Greqi pas pushimeve të Vitit të Ri, duhet të paraqesin testin negativ në doganë, t’i nënshtrohen testit të shpejtë dhe të futen në një karantinë 10 ditore të detyrueshëm.
Në 24 orët e fundit, Greqia raportoi 1.251 raste të reja me Covid-19 dhe 29 viktima.
