Bordi i Transparencës vendosi çmime të reja për naftën, benzinën dhe gazin. Nga dje shqiptarët e kanë blerë naftën me 258 lekë/litri, benzinën me 243 lekë/litri dhe gazin 86 lekë/litri. Ky është rekordi historik i çmimit të shitjes së naftës dhe benzinës në Shqipëri. Gjatë ditëve të fundit ka patur akuza në lidhje me funksionimin e bordeve të çmimit të karburanteve dhe ushqimeve. Në lidhje me këtë çështje, Konfindustria kërkon që qeveria shqiptare të ndërhyjë në uljen e çmimit të karburanteve në tregun vendas. Në një njoftim zyrtar theksohet se çmimet e larta të karburanteve po prodhojnë pasoja shkatërruese për prodhimin vendor, industritë, bizneset dhe qytetarët shqiptarë.
Njoftimi:
Konfindustria kërkon ndërhyrjen e menjëhershme të qeverisë për ndryshimin e politikave fiskale, me qëllim uljen e çmimit të karburanteve në tregun shqiptar. Çmimet e larta të karburanteve po prodhojnë pasoja shkatërruese për prodhimin vendor, industritë, bizneset dhe qytetarët shqiptarë.
Çmimi i karburanteve në tregun shqiptar në javën e parë të qershorit 2022, shkoi në rekordin historik të afër 2,3 euro/litër më i larti në rajon dhe nga më të lartët në Europë. Në Kroaci çmimi i naftës është 1,7 euro/litër. Çmime ndjeshëm më të ulta ka Maqedonia e Veriut, Kosova, Mali i Zi, etj. Konfindustria kërkon si ndërhyrje të parë uljen e ngarkesës fiskale të karburanteve në nivele të njëjta me shtetet e rajonit. Përvec me pasoja të pallogaritshme të rënda në ekonominë kombëtare, taksimi shumë i lartë i karburanteve është burimi më i madh i shmangies fiskale me qindra milion euro në dëm të buxhetit të shtetit. Sipas të dhënave krahasuese në Shqipëri deklarohet pothuaj 20% konsum karburanti më pak nga Kosova kur duhet të ishte krejt e kundërta. Konfindustria vlerëson, se është domosdoshmëri cbërja e Bordit të Trasparencës dhe krijimi i Entit Rregullator të Karburanteve si institucion profesional i përhershëm, në varësi të Kuvendit të Shqipërisë sipas shëmbujt të ngjashëm të shteteve fqinje.
