Të blesh apo të marrësh një shtëpi me qira në kryeqytet nuk është shumë e lehtë për familjet shqiptare. Edhe pse sipas projeksioneve të Divizionit të Popullsisë së OKB, në Tiranë vijnë për të jetuar 70 persona çdo ditë. Dhe në vit janë rreth 30 mijë shqiptarë që lëvizin nga fshati drejt kryeqytetit. Duke ndikuar në këtë mënyrë edhe në rritjen e çmimeve. Fatjon Hysenbelliu, drejtuesi i agjencisë imobiliare ‘Future Home’ tregon për Tirana Today arsyet e ngritjes së çmimeve.
“Kemi faktorin e tatimeve dhe taksave që praktikisht po ndikojnë drejtpërdrejtë te ndërtuesi. Edhe tregu si edhe kërkesa në zona respektive të qytetit ka pasur dyndje.
Qendra është më e preferuara për të gjithë, por në fund vendosen në periferi. Ndërkoha zona më e preferuar është ajo e Bllokut. Qiraja është në trend rritës. Një qira 1+1 me nivele mobilimi normal brenda Unazës së Vogël, shkon rreth 300€. Jashtë kësaj zone si Unaza e Re apo Freskut arrin rreth 300 mijë lek.
Por, edhe këto çmime kanë një tendencë rritje, sepse masa është e predispozuar në këto zona.”
Sipas Hysenbelliut ngritja e më shumë pallateve në zona të caktuara, mund të sjellë edhe uljen e çmimit.
“Në Unazën e Re apo në Fresk ka kërkesa të cilat vetë zonat nuk i mbulojnë. Në momentin që do të hapet pjesa e ndërtimeve në këto zona, mendoj që do të ketë edhe pak ulje të çmimeve.”
Paga të ulëta, çmime të larta
Teksa shqiptarët kryesisht janë të drejtuar drejt shtëpive me qira, ata ankohen për çmimet e shtrenjta.
“Në krahasim me rrogat, janë çmime të kripura. Një që e ka shtëpinë me qira e ka të vështirë ta përballojë. Gjithandej janë çmime të shtrenjta.”
“Me gjendjen tonë ekonomike janë shumë të shtrenjta. Djali im ka krijuar familje dhe është duke hequr më keq se unë. Kjo sepse nuk e blen dot shtëpinë. Unë habitem pse i ngrenë kaq lartë këto qiratë, kur ai person as nuk e merr rrogën aq sa kërkohet.”
Një i ri thotë për Tirana Today se shumë njerëzve i duhet të sakrifikojnë në mënyrë që të përballojnë qiranë.
“Unë paguaj qiranë rreth 300 mijë lek. Nuk është shumë shtrenjtë, por as rroga minimale nuk është se e përballon lehtë. Më duhet të sakrifikoj jetën personale, që të punoj gjithë kohën. Veç kështu mund ta përballoj qiranë. Por, kjo nuk është vetëm për mua. Kështu janë shumë të rinj apo dhe familjarë.” TIRANA TODAY
