Manchestër City padyshim është ekipi më i fortë në Premier League këtë sezon dhe e ka të merituar plotësisht vendin e parë deri në këto momente. Ata kanë mposhtur me rezultat 3-1 Arsenalin në përballjen e sotme në “Etihad Stadium”. Kjo ishte fitorja e 10 në 11 ndeshjet e luajtura deri tani në kampionat, ku kanë ngecur vetëm në një rast në barazim. City i Guardiolas kryeson me 31 pikë dhe me këtë fitore rrit presionin ndaj Manchester United që do të përballet me Chelsean në Londër.
Ndeshja zhbllokohet që në minutën e 19’ me anë të De Bruyne, i cili shënon një gol mjaft të bukur. Më pas janë topçinjtë që kërkojnë të gjejnë golin e barazimit por nuk ia dalin dot, në pjesën e parë. Pjesa e dytë nis me ritme mjaft të larta për të dyja ekipe, ku Arsenal provon të barazojë me Sanchez dhe Lacazzete, por nuk arrijë të finalizojnë si duhet. City fiton një 11-metërsh në minutën e 50’ me anë të Sterling dhe është Aguero që e ekzekuton dhe e dërgon në rrjetë. Por 15’ minuta më vonë reagon Arsenal me Lacazzete që shkurton diferencën. Më pas kërkojnë barazimin por kualitetet e larta që ka Manchesteri bëjnë që të gjejnë edhe golin e tretë në minutën e 74’ me anë të Gabriel Jesus të sapo inkuadruar në fushën e lojës.
