Cikloni mesdhetar “Cassilda” po i afrohet brigjeve perëndimore të Greqisë, dhe në shtetin fqinj pritet të ketë rrebeshe intensive shiu, përmbytje dhe stuhi ere.
Deri më tani 8 rajone të Greqisë janë në gatishmëri, pasi pritet të goditen nga stuhia sub-tropikale nga minuta në minutë.
Shqipëria nuk do të preket plotësisht nga ky ciklon. Vendi ynë do të preket nga periferia e aktivitetit të këtij cikloni, duke sjellë mbi vendin tonë në orët e pasdites reshje shiu kryesisht në jug të vendit.
Dita nis me vranësira mesatare deri të dendura, dhe reshje shiu në zonën jugore. Sot pritet të ketë erë intensive me drejtim kryesor nga kuadrati i Veriut me shpejtësi mesatare 2-8m/s, por hera herës era fiton intensitet deri në 15-25m/s kryesisht përgjatë vijës bregdetare, zonat e ulta pranë tyre si dhe zonat luginore të vendit.
Në fushën termike vlerat e mëngjesit parashikohen nga 17°C në relievet malore deri në 23°C në ato të ulta, ndërsa në vlerat e mesditës nga 23°C në relievet malore deri në 33°C në ato të ulta.
