Sëmundjet me origjinë ushqimore, po njohin rritje në vendin tonë. Shpesh, qytetarët përballen me produkte të pasigurta, të rritura me hormone dhe pesticide.
Në disa prej kontrolleve të bëra nga AKU, janë zbuluar produkte me data skadence të modifikuara, si edhe kushte të këqija higjieno-sanitare. Më shumë problematik vazhdon të jetë mishi, qumështi dhe produktet e tij.
Xhilda Pepa, përgjegjëse e sektorit të inspektimit AKU, në një intervistë për Tirana Today tha se vetëm në një javë, në kryeqytet janë vendosur 6 gjoba, si edhe ka mbyllur aktivitetin e një biznesi dhe janë bllokuar rreth 1.2 ton djathë.
“Ne kemi konstatuar edhe produkte që nuk kanë certifikata veterinare, nuk kanë vulë dhe kemi asgjësuar me mijëra ton.”
Ndërkohë, eksperti dhe ish-drejtori i Shërbimit Veterinar Edi Fero, tha për Tirana Today se mishi i importuar në Shqipëri ka shifra të frikshme në raport me konsumimin vendas.
“Në Shqipëri ka akoma fermerë primitiv. Ata prodhojnë në kushte jashtëzakonisht të pavorshme, janë të pasubvencionuar me vendet e rajonit, pa u asistuar nga profesionistë.”
Kjo gjë ka bërë që produktet vendase të qëndrojnë nën hijen e atyre të importuara.
“Shqipëria është një vend që është përdorur dhe po përdoret valvul shkarkimi për produkte të cilat janë gati për skadencë, për produkte që refuzohen nga shtete me standarde të larta.”
Fero bën thirrje për të refuzuar sa më shumë produktet të cilat vijnë nga jashtë. Pasi ato janë të pakrahasueshme, me produktet vendase.
Sipas tij, shërbimi dhe kontrollet e bëra nga AKU lënë për të dëshiruar.
“Mjaft të analizoni se sa drejtorë janë ndërruar dhe a ka pasur ndonjëri lidhje me bujqësinë apo blegtorinë. Kështu ju do ta kuptoni qartë se si ka funksionuar dhe si po funksionon ai institucion. E drejtojnë njerëz të cilët janë jashtë profilit, ky është një nga handikapët më të fortë, e cila duket se tani ka marr kulturë dhe është diçka normale në vend.” Tirana Today
