“Xhafaj dhe Tahiri mbeten turpi i Shqipërisë, e ndërsa po pengojnë integrimin e vendit”. Ky ka qënë sinkroni i vazhdueshëm i trumbetuar nga ana e PD-së e LSI-së. Opozita, me një kërkesë të shpeshtuar kohëve të fundit, thotë se qeveria duhet të rishikojë dorëheqjen e Xhafajt dhe plotësimin e prioriteteve për çeljen e negociatave e të mos merret me propagandë.
Por ndryshe nga akuzat e parashtruara më herët nga klasa politike shqiptare, BE-ja ndan një tjetër qëndrim. Është komisioneri i BE-së, Johanes Hahn, i cili ka folur pa doreza, duke vënë pikat mbi “i”, se Shqipëria i ka përmbushur të gjitha kërkesat dhe se reforma në gjyqësor mbetet një ndër prioritetet kryesore.
Ky qëndrim bie ndesh me dy vendet europiane, Franca dhe Holanda, të cilët janë skeptike për hapjen e negociatave me vendin tonë. Por edhe për këtë, ai ka një përgjigje. “Unë jam i bindur se Franca dhe Holanda do të shohin gjithashtu “gotën gjysmë plot”, është shprehur ai.
Teksa Hahn hap dritën jeshile, numri dy i partisë së Kancelares Merkel në CDU/CSU, Dr. Johann David Wadephul nuk shprehet pozitiv, duke nënvizuar se Shqipëria nuk ka plotësuar asnjë kusht për hapjen e negociatave.
“Ne duam që Shqipëria të mund të fillojë sa më parë negociatat e anëtarësimit. Në marrëveshjen e koalicionit mes CDU / CSU dhe SPD është shumë e qartë: “Kushti për hapjen e negociatave për anëtarësim është që vendet e Ballkanit Perëndimor, të përmbushin plotësisht kriteret e duhura”. Por kjo nuk ka ndodhur as në Reformën në Drejtësi, as në luftën kundër korrupsionit, veçanërisht korrupsion të rangut të lartë, as në luftën kundër krimit të organizuar, pra në asnjë nga kriteret kryesore”, deklaroi ai.
Po kështu ai nuk ka lënë pas edhe emrat të cilat lakohen mësë shumti në politikën shqiptare, e cila është një çorbë e vërtetë. Ai vendos gishtin mbi Tahirin, duke e cilësuar si “peshk të madh”, e nuk kursehet që Xhafës ti kërkojë dorëheqjen.
Gjermania ka shprehur haptazi pakënaqësinë, ndërsa z. Wadephul shprehet se nuk janë plotësuar prioritetet e BE-së, që do të çonin në hapjen e negociatave në fund të këtij muaji.
Në kohën kur flitet për peshq e cironka, ai ka një argument të fortë. “Çështja Tahiri është një “peshk i madh”. Në këtë çështje kemi të bëjmë deri sot me shkelje të hapur të parimeve themelore të shtetit ligjor. Kjo çështje është një pengesë reale për hapjen e negociatave. Nëse ambasadori amerikan Donald Lu hedh akuza kaq të forta, atëherë duhet ta marrim këtë shumë seriozisht, sepse ambasadori Lu deri tani nuk ka rënë në sy si mik i opozitës”, ka deklaruar ai më herët.
Wadephul thotë se peshqit e mëdhenj janë të paprekur, dhe se në rrjetë kanë rënë vetëm peshq të vegjël. Po kaq, ai e cilëson Tahirin si peshk të madh, dhe se çështja e tij është pengesë reale për hapjen e negociatave.
Këto dy deklarata janë aq kontradiktore, sa të japin ndjesinë e paqëndryeshmërisë në politikën shqiptare, të cilët nuk gjejnë gjuhën e përbashkët. Është e padiskutueshme që qytetarët shqiptarë meritojnë më shumë nga politika, e ndërsa bojkoti, gjuha e urrejtjes nuk janë asgjë para korrupsionit e drejtësisë.
Tirana Today
