Një gjyqtar i Gjykatës së Shkallës së Parë në Korçë është kërcënuar me jetë nga dy persona për shkak të detyrës. Mësohet se është kërcënuar gjykatësi Besnik Shehu dhe familja e tij.
Gjyqtari Shehu ka bërë denoncim në polici ndaj dy personave që ai pretendon se e kanë kërcënuar. Ata janë Erin Myrtollari dhe Muhamet Hoxha, të cilët kanë qenë palë në një proces civil në Gjykatën e Korçës. Sipas burimeve, mësohet se bëhet fjalë për çështje pronash.
Sipas kallëzimit të gjyqtarit, dy personat e kanë kërcënuar mëngjesin e sotëm në një ambient publik. Pas denoncimit të bërë në komisariat, Erin Myrtollari dhe Muhamet Hoxha janë shoqëruar nga uniformat blu për të verifikuar këtë çështje. Ata u proceduan për veprën penale “kanosje për shkak të detyrës” dhe po hetohen në gjendje të lirë.
Njoftimi i Policisë së Korçës:
Më datë 08.09.2018 në Komisariatin e Policisë Korçë, është paraqitur dhe ka bërë kallëzim shtetasi B.Sh, 54 vjeç, banues në Korçë, me detyrë gjyqtar pranë Gjykatës së Rrethit Gjyqësor Korçë, i cili ka deklaruar se për shkak të detyrës, për një çështje pronash që ka shqyrtuar në vitin 2016, është kanosur me fjalë në qytetin e Korçës, nga shtetasit M.H, 66 vjeç, banues në Korçë dhe E.M, 65 vjeç, banues në Porodinë-Korçë.
Shtetasit e mësipërm janë shoqëruar në Komisariat, ku janë kryer të gjitha veprimet proceduriale dhe në konsultim me Prokuroren e çështjes u proceduan në gjendje të lirë për veprën penale “Kanosja për shkak të detyrës” parashikuar nga neni 238 i Kodit Penal.
