Mbrëmë Parlamenti shqiptar miratoi me 120 vota ngritjen e Komisionit Hetimor për çështjen “Tahiri”.
Kërkesa u dorëzua nga deputetët e Partisë Demokratike në Kuvend, ku kërkonin që të ngrihej një Komision Hetimor në lidhje me verifikimin e moslejimit të arrestimit të ish-ministrit, verifikimin e pengimit e Prokurorisë për ta hetuar atë dhe efektet që sjell ekstradimi i Nazer Seitit për çështjen Tahiri.
Tirana Today kontaktoi kryetarin e Komisionit Hetimor për çështjen “Tahiri”, Edi Paloka, dhe e pyeti se kur do t’i nisë punimet ky komision, si do procedohet me këtë çështje dhe çfarë kërkon të arrihet nga punimet e tij?
Kreu i Komisionit dhe njëherësh nënkryetar i Partisë Demokratike tha se komisioni do t’i filloi punimet menjëherë sapo të miratohet përbërja e anëtarëve. Paloka ka bërë të ditur se deri më tani janë dërguar vetëm emrat e anëtarëve të Partisë Demokratike që të miratoheshin në seancë dhe se Partia Socialiste nuk i ka dërguar.
Për mediat u bë e ditur se anëtarët e komisionit do të ishin: Enkelejd Alibeaj, Flamur Noka, Myslym Murrizi dhe nga ana e Lëvizjes Socialiste për Integrim do të jetë Endrit Brahimllari. Kryetar i komisionit do të jetë Edi Paloka dhe nënkryetare do të jetë deputetja socialiste, Ermonela Felaj. Deputetja socialiste është i vetmi emër i konfirmuar nga PS si pjesë e Komisionit Hetimor të ngritur ndaj deputetit të tyre Saimir Tahiri.
Zoti Paloka ka theksuar se me këtë çështje do të procedohet ashtu siç e parashikon ligji dhe rregullorja për komisionet hetimore dhe ajo çfarë kërkohet të arrihet me ngritjen e këtij komisioni janë paraqitur dhe në kërkesën që iu bë Kuvendit për ngritjen e komisionit ku më kryesoret janë:
1-Verifikimi i ligjshmërisë dhe efekteve të vendimit të Kuvendit për të mos lejuar arrestimin e Tahirit.
2-Veprimet e kryeministrit dhe anëtarëve të tjerë të qeverisë në pengimin apo intimidinin e prokurorisë për të hetuar Tahirin në mënyrë të pavarur.
3-Ligjshmëria e ekstradimit të Nezar Seitit si person nën hetim për të njëjtën çështje si Tahiri dhe efektet që sjell ekstradimi i tij për ish-ministrin e Brendshëm. Tirana Today
