Katër pikë në tre ndeshjet e para nuk i afrohen aspak asaj që pritej nga Barcelona e Ernesto Valverde në këtë sezon në La Liga, por ajo që shqetëson klubin katalunjas me shumë se nisja zhgënjyese dhe dëmtimi i Lionel Messi-t është atmosfera e keqe që ka pushtuar dhomat e zhveshjes.
Është ky përfundimi i të përditshmes spanjolle “Marca”, e cila tregon se si dështimi i madh në merkato sa i përket çështjes “Neymar” është shoqëruar me një pakënaqësi të dukshme te futbollistët. Grupi ndjehet i zhgënjyer për mënyrën si u trajtua operacioni për rikthimin e “O Ney”. Duke qëndruar në atë që raporton gazeta iberike që në titullin e faqes së parë, lojtarët më të rëndësishëm të ekipit prisnin sulmuesin brazilian, ashtu siç edhe i kishte premtuar presidenti Bartomeu.
Kjo nuk ndodhi dhe “senatorët” e skuadrës “blaugrana” ndjehen të tradhtuar, pasi sipas tyre klubi nuk kishte i interesuar plotësisht për të risjellë Neymar në “Camp Nou”. Kjo gjë ka minuar besimin mes palëve, duke e bërë akoma më të vështirë punë për trajnerin Valverde.
Por transferimi i munguar i brazilianit nuk është shkaku i vetëm që ka prishur humorin te Barcelona. Shumë prej lojtarëve u futën në “vallen” e tratativave të gjata mes klubit katalunjas dhe Paris SG, duke humbur statusin e tyre në skuadër. Kështu, Rakitic, Dembele, Vidal, Semedo dhe Tobido nuk e kanë pritur aspak mirë trajtimin si “mall shkëmbimi”, shkruan “balkanweb”.
Në fund është çështja që lidhet me Antoine Griezmann. Transferimi i francezit që në të shkuarën kishte sulmuar ashpër dhe hapur Barcelonën nuk është parë asnjëherë me sy të mirë nga “senatorët”, sidomos nga Leo Messi dhe kjo është konfirmuar nga daljet e pakta dhe të ftohta mes dy futbollistëve përpara mediave.
