Një flluskë sapuni gjigante. Kjo ishte ajo që bëri Florentino Perez me denoncimin e tij për Interin në FIFA. Siç ju kemi treguar edhe më parë, Real Madrid kishte bërë tek FIFA denoncim kundër Interit me motivacionin se zikaltërit kishin kontaktuar Luka Modric. Por me sa duket, tentativa e klubit madrilen dhe Florentino Perez ka dështuar totalisht dhe gjithçka është mbyllur me një ‘hiç’ te madh.
Organizimi më i lartë i futbollit botëror i ka dhënë fund njëherë e përgjithmonë thashethemeve dhe kësaj historie duke i dërguar një letër me komunikim zyrtar si Interit por edhe Real Madrid, sipas asaj që thotë Gazzetta dello Sport.
Sipas të përditshmes Italiane, FIFA i ka shkruar klubeve se nuk ekzistojnë elementet e duhur që të hapet një hetim ndaj Interit dhe se zikaltërit nuk e kanë thyer aspak artikullin 18 të rregullores së merkatos së futbollistëve.
Akuzat e Real Madrid janë cilësuar si “të pabazuara në fakte”. FIFA ndërkohë, e ka bëre dëgjimin paraprak të palëve pas denoncimit të Real Madrid. Ata kanë dëgjuar versionin e Interit, Real Madrid por edhe të lojtarit.
Mbyllet kështu njëherë e përgjithmonë kjo çështje dhe Interi del totalisht e pafajshme nga e gjithë kjo histori, edhe pse Florentino Perez mund të mos jetë shumë i lumtur. Ndërkohë nga klubi zikaltër tregojnë se nuk ka pasur asnjëherë frikë apo dyshime se vendimi i FIFA-s do të ishte ky sepse nuk ka qenë Interi ajo që ka kontaktuar lojtarin.
