Sa i takon çështjes së Adriatik Llallës, mësohet se janë dorëhequr dy gjyqtarë. Mësohet se sot kanë dhënë dorëheqjen nga gjykimi i çështjes së ish-kryeprokurorit Adriatik Llalla gjyqtarët Saida Dollani dhe Dhimitër Lara.
Shkak për tërheqjen e tyre është bërë fakti se ata kanë marrë pjesë në vendimin për sekuestron e pasurive të Llallës. Dy anëtarët e dorëhequr të trupës gjykuese pritet të zëvendësohen nga Miliana Muça dhe Enton Dhimitri.
Dorëheqja e tyre ka bërë që të shtyhet seanca e parë në GJKKO për ish-kryeprokurorin, i cili u shpall fajtor në shkallën e parë dhe u dënua me 2 vite burg.
Më 3 qershor, ish-kryeprokurori i Përgjithshëm, Adriatik Llalla, ankimoi vendimin për dënimin me 2 vite burg në Shkallë të Parë për akuzën e ‘fshehjes së pasurisë’, pasi gjykata e Posaçme Kundër Korrupsionit dhe Krimit të Organizuar e dënoi më 20 maj me 2 vite burg. Përveç dënimit me burg, GJKKO ka vendosur që Llalla të mos mbajë për 5 vite poste publike. Llallës i janë sekuestruar edhe 4 sipërfaqe toke që në total shkojnë në mbi 22 mijë metër katror, si dhe një apartament në qytetin e Durrësit.
Llalla u akuzua për disa vepra penale që përfshijnë “Refuzim për deklarim, mos deklarim, fshehje ose deklarim i pasurive, interesave privat të personave të zgjedhur dhe nëpunësve publik ose i çdo personi tjetër që ka detyrim ligjor për deklarim”. Adriatik Llalla u hetua edhe për pastrimin e parave, por në finale u dërgua për gjykim vetëm për fshehje të pasurisë.
