Pasi deputeti i PD-së Tritan Shehu kërkoi që në seancën dëgjimore për çështjen detare të ishte i pranishëm presidenti Ilir Meta, ka reaguar Presidenca.
Kjo e fundit i është përgjigjur pozitivisht kërkesës së demokratëve, ndërsa pohoi se zoti Meta është gati të përgjigjet para deputetëve në Kuvend. “Presidenti Ilir Meta është gati të shkojë në Parlament dhe të përgjigjet para deputetëve”, thuhet në përgjigjen e Presidencës.
“Kërkese për një mbledhje të dytë. Të thërrasim edhe presidentin e Republikës, Ilir Metën. Nuk na intereson se sa herë ka pirë kafe ministri me presidentin, por na duhen komunikimet zyrtare”, tha Shehu në komision, ku ishte thirrur në një seancë dëgjimore ministri Ditmir Bushati.
Ministri i Jashtëm, Ditmir Bushati i pranishëm në seancën dëgjimore për Marrëveshjen e detit i thirrur nga Komisioni për politikën e jashtme tha se është takuar me Presidentin Ilir Meta dhe kjo është e faktuar. “Presidenca dhe Ministria e Jashtme ruhen nga Garda dhe çdo takim është i faktuar”.
Sipas Bushatit, Presidenti Meta është detyruar të thotë jemi takuar, pas letrës së dytë që i ka dërguar.
Është detyruar pas letrës sime të dytë, ku i përcaktoj se ku jemi takuar, sepse ju e dini që Presidenca dhe Ministria e Jashtme ruhen nga Garda e Republikës dhe hyrjet daljet e njerëzve janë të monitorueshme dhe çdo gjë që them unë apo ai janë të faktuara.Kam bërë konsultë me Presidentin e Republikës dhe jam takuar para Korçës dhe e kam informuar se kërkesa do të vijë në mënyrë shkresore”.
Bushati dha se nuk ka një marrëveshje dhe kur të ketë do bëhet publike.
Ndërsa përsa i përket emrave të negociatorëve, ministri Bushati tha se kush ka ankesa ti drejtohet instancave shtetërore. “Kush ka vërejtje për emrat e negociatorëve ti drejtohet instancave shtetërore”. TIRANA TODAY
