Mikel Shallari, i akuzuar për vrasjen e komisarit Artan Cuku është paraqitur para Gjykatës së Krimeve të Rënda.
Zbulimi i ngjarjes dhe këtij personi si autor i dyshuar i vrasjes, është bërë nga analiza e kamerave të sigurisë, ku është vërejtur largimi i personit të dyshuar nga vendi i ngjarjes. Ka qenë ADN-ja në xhepat e bluzës sportive që ka lënë në kosh autori ajo që ka zbardhur identitetin e Mikel Shallarit.
Ky i fundit nuk i ka pranuar të flasë apo të japë detaje, pasi e vetmja përgjigje që ka dhënë kur u pyet nëse kishte diçka për shtuar, ishte: S’kam asnjë gjë për të shtuar. Do të flas një herë tjetër.
24-vjeçari ka refuzuar edhe bashkëpunimin e ofruar, për të përfituar statusin e të penduarit, duke vijuar të mbajë qëndrim mohues lidhur me akuzën e ngritur ndaj tij.
Shallarit i janë ofruar të gjitha mundësitë për të bashkëpunuar me drejtësinë, duke i përmendur edhe përfitimet që mund të ketë në rast se tregon porositësit, si pamundësia për një burgim të përjetshëm, që në këto rrethana ai rrezikon, e deri te futja e familjes së tij në programin e mbrojtjes së dëshmitarëve, që parashikon strehim të sigurt jashtë vendit e ndryshim identiteti.
