Trajneri i Kombëtares, Edi Reja ka folur në prag të sfidës miqësore që Shqipëria do të zhvillojë nesër në orën 20:15 ndaj Çekisë.
Gjatë konferencës për shtyp, Reja u shpreh se Çekia ndodhet në të njëjtin nivel me Uellsin, skuadër me të cilën kombëtarja zhvilloi një miqësore pak ditë më parë, e përfunduar me rezultatin 0-0.
Tekniku 75-vjeçar tha se lojtarët e kombëtares duhet të përmirësohen në ndeshjen e nesërme, teksa shtoi se një nga pikat ku do të bazohet, do të jenë kundërsulmet.
Edi Reja: ”Gjithmonë duhet të jemi vigjilentë. Pas një ndeshje të lodhshme me Uellsin, duhet të bëja vlerësimet e mija. Ishte një ndeshje impenjative. Do të pres deri nesër në mëngjes për të marrë një vlerësim për lojtarët. Më pas do të marrë një vendim. Çekia është një nivel me Uellsin si kundërshtar. Kanë lojtarë të shpejtë që luajnë shumë mirë me kundërsulm, luajnë mirë me topat e gjatë, nuk humbasin kohë. Shfrytëzojnë mirë hapësirat dhe të vendosin në vështirësi në çdo moment.
Ne presim që të shfaqim përmirësime në këtë ndeshje veçanërisht në fazën sulmuese. Duhet të jemi më të zotë në kundërsulme. Mbrojtja është repart i konsoliduar dhe ka bërë shumë mirë. Me Çekinë duhet të përmirësohemi në sulm që të tregojmë që kemi bërë hapa përpara. Duhet të krijojmë sa më shumë raste. Unë jam i bindur që ne do të përmirësohemi dhe kjo do të nisë që nga kjo ndeshje.”
