Çështja “Çani” te Partizani është parësore për tu zgjidhur. Që nga vera kur iu bashkua ekipi ai është paraqitur shumë pak në fushë dhe po fiton shumë para. E gjitha kjo për problemet me gjurin, ku doktorët që e operuan dolën garant asokohe se do të ishte i gatshëm në fillim të kampionatit. Në verë, ai firmosi kontratë dyvjeçare, duke e bërë më të paguarin në Superiore me 20 mijë euro rrogë në muaj.
Kontrata “e kopsitur” në gusht e detyron Partizanin që ta presë lojtarin, gjersa nuk ka një marrëveshje me mirëkuptim për të ndryshuar termat, ndonëse rendimenti i sulmuesit është zero. Në ditët e fundit të 2017- ës u hap një dritë jeshile për të ardhmen e sulmuesit, pasi mjekët që e operuan në verë dhanë garanci se ai mund të jetë gati në shkurt pas pastrimit të gjurit.
Çani e ka kryer pastrimin e gjurit, por stafi mjekësor ka vendosur që lojtari të mos udhëtojë me ekipin në Turqi për fazë përgatitore. Stafi mjekësor, në bashkëpunim me lojtarin dhe klubin kanë vendosur që Çani ka kryejë fazën intensive rikuperuese në Romë, pikërisht pranë klinikës ku është operuar në maj dhe ku ka kryer pastrimin e fundit të gjurit. Gjatë kohës që ekipi do të përgatitet në Antalia, Çani do të vijojë programin stërvitor në Itali me garancinë se ai do të jetë gati për ekipin në fund të janarit.
Edhe në verë pati një garanci nga mjekët italianë se ai do të ishte gati në fillim të sezonit, por rezultoi e kundërta. Ndaj, sërish ekziston frika në kampin e kuq që garancia e dimrit të jetë si e verës për Edgar Çanin. Klinika mund ta bëjë gati 28- vjeçarin në aspektin fizik, gjë e cila mbetet e shumëdëshiruar te “demat”, por ai do të humbasë përgatitjet me grupin. Pra, edhe sikur të jetë gati fizikisht, atij do t’i duhet sërish kohë që të harmonizohet me grupin.
Gjithsesi, trajneri Starova, në përfundim të pjesës së parë të sezonit, e dha mendimin e tij për Çanin: “Çështja e Çanit për mua është koklavitur, pasi është puna e kontratës në mes. Pretendohet që të bëhet sërish një pastrim i gjurit sepse, pas kontrolleve të fundit, ka rezultuar se operacioni i gjurit qenka mirë. Por, unë nuk jam i ngrohtë në drejtim të Çanit, ndaj nuk e mbaj shpresën tek Edgari. Do të ishte gabim po ta mbaja shpresën te Çani”.(p.sport)
