Njihet si “Trëndafili i erërave”, hetimi që dokumentoi trafikun e lulëzuar kriminal mes Shqipërisë dhe Katanias. Çështje kriminale me në qendër transportin e ngarkesave të mëdha me marijuanë. Peshkarexhat niseshin nga portet shqiptare me destinacion Sicilinë. Prokurori i çështjes Andrea Bonomo i cili drejtoi dhe hetimet e Guardia di Finanza ka kërkuar daljen para gjykatës së të akuzuarve. Në 31 maj do të jetë dhe seanca gjyqësore.
Në bankën e të akuzuarve janë gjithsej 16 persona, mes të cilëve dhe tre shqiptarët Moisi Habilaj, Fatmir Minaj dhe Maridian Salaj. Mediat italiane shkruajnë se kjo çështje ka shkaktuar trazira dhe në politikën shqiptare mbi aftësinë për të ndaluar trafikun ndërkombëtar të drogës nga ana e institucioneve shqiptare.
Portali “LiveSicilia – Katania” shkruan se ishin lidhjet farefisnore mes Moisi Habilajt, një nga krerët e bandës kriminale sipas hetuesve italianë dhe ish-ministrit shqiptar Saimir Tahiri që shkaktuan reagime të forta në vendin tonë. Më tej në shkrim thuhet se hetimet e policisë italiane në Katania krijuan shumë polemika në nivel politik në Shqipëri edhe pse disa vjet më parë, një ish-agjent shqiptar policie kishte hedhur akuza të rënda për sa i përket mbrojtjes që iu bëhet trafikantëve të drogës nga nëpunës të institucioneve të korruptuara.
Cilët janë personat e vënë hetim deri më tani nga Prokuroria e Katanias?
A figuron emri i ish-minstrin Tahiri në regjistrin e të hetuarve?
Këto pyetje priten të marrin përgjigje me nisjen e procesit gjyqësor, si dhe gjatë zhvillimit të seancave të tij ku do të zbardhen detajet e operacionit, përgjimet e antimafias italiane si dhe versionet e fakteve të vënë nën akuzë nga të arrestuarit.
Deri në mes të dhjetorit të vitit 2017 në regjistrin e të hetuarve për operacionin Rosa dei Venti figurojnë 15 persona; Moisi Habilaj, Angelo Busacca, Fatmir Minaj, Gianluca Passavanti, Antonino Riela, Maridian Sulaj, Vincenzo Spampinato, Fabio Spampinato, Carmen Sandro Berolini, Enrivo Maria Giaquinta, William Patane, Massimiliano Maria Brundo, Rosario Giuliano, Antonio Greco, Giuseppe Greco, si dhe Nezar Seitaj i arrestuar nga Prokuroria shqiptare dhe i ekstraduar në Itali.
Prokuroriia e Katanias dhe Antimafia Italiane prej disa muajsh kanë përcjellë në Tiranë dosjen hetimore ndaj këtij grupi trafikantësh duke kërkuar informacione e bashkëpunim hetimor në zbardhjen e plotë të përgjegjësve të këtij trafiku të madh droge mes Shqipërisë dhe Italisë. TIRANA TODAY
