Ministri i Jashtëm në Detyrë, Gent Cakaj ka treguar se me kryeministrin Rama është njohur përmes shefes së zyrës së kabinetit të tij, teksa deklaroi se pas universitetit është kontaktuar fillimisht nga kabineti.
“Pas performancës në universitet u kontaktova nga kabineti i tij dhe pastaj nëpërmjet takimeve. E them edhe njëherë kryeministrin Rama e kam njoftuar përmes shefes së zyrës së Kabinetit të tij. Fillimisht nuk e kam takuar personalisht”, u shpreh Cakaj.
Sa i përket informacioneve konfidenciale në kohën kur ka qenë zv.ministër, Cakaj tha se nuk ka shkelur asnjë ligj pavarësisht akuzave të ngritura.
“E kam marrë në përputhje me procedurat ligjore. DSIK ka dhënë miratimin për mua. Publiku është manipuluar. Nuk mund të pranosh informacion të klasifikuar pa firmosur në dosje. Për shkak se nuk ka kufizime kohore. Në vetë deklaratën e DSIK thuhet se institucionet e sigurisë në Kosovë kanë dhënë vendimin e tyre. Të gjitha rekomandimet janë pozitive, në dosjen time nuk mungon asnjë informacion”, tha Cakaj.
