Ministri në detyrë për Evropën dhe Punët e Jashtme, Gent Cakaj, në një konferencë për mediat tha se raporti i OSBE/ODHIR-it tregoi edhe një herë se zgjedhjet ishin demokratike. Po ashtu ai pohoi se në raportin në fjalë vihej theksi tek dhuna ndaj institucioneve e ushtruar nga opozita.
“Në 30 qershor 2019, Shqipëria ka pasur një sfidë shumë më shumë se zgjedhjet lokale. Është absurd të thuash që zgjedhjet nuk janë legjitime, sepse ti nuk ke marrë pjesë në to.
Ne jemi përballur me një dhunë dhe vandalizëm nga opozita, si para zgjedhjeve dhe gjatë tyre, gjë që theksohet dhe në raportin e OSBE-së”, tha Cakaj.
Ai u shpreh i gatshëm për dialog me opozitën, duke e ftuar atë në një tryezë, për të diskutuar mbi gjetjet e raportit.
“Duhet të rifillojë një dialog politik për të gjitha gjetjet e raportit të OSBE. Nëse për asgjë tjetër, ky raport është më shumë kritik për opozitën, se sa deligjimim për qeverinë. Në Shqipëri zgjedhjet janë zhvilluar pa interesa të caktuara të elektoratit, kjo është vëzhgim objektiv i realitetit, por kjo ka ardhur pas bojkotimit të zgjedhjeve. Pasi nuk është mundësuar pluralizmi dhe garën mes kandidatëve”, u shpreh ai.
