Deputeti demokrat, Oerd Bylykbashi tha se prokurorët i kanë marrë mesazhet e Arta Markut për të vepruar sipas urdhrave dhe jo drejtësisë. I ftuar në intervistën e mbrëmjes në Ora News, Bylykbashi deklaron se mazhoranca e ka kthyer në një farsë reformën në drejtësi. Ai thotë nën hundën e kryeprokurores provizore po ndodhin ngjarje shumë të rënda për sistemin e drejtësisë.
“Ne thjesht ekspozojmë këtë farsën e reformës në drejtësi të Edi Ramës, një reformë që ka prodhuar prokurorin e përgjthshëm provizor. Nën hundën e saj po ndodhin një seri situatash të rënda në sistemin e drejtësisë, i kthehet pasaporta Saimir Tahirit, lirohet bashkëpunëtori i tij, nuk bëhet rekurs në Gjykatën e Lartë për çështjen Xibraka. Dhe e fundit fare, ajo që ndodhi me ekstradimin e dëshmitarit kyç në çështjen Tahiri-Habilaj në prokurorinë e krimeve të rënda, e çuan me proces të përshpejtuar në Itali vetëm për ta hequr nga duart e drejtësisë shqiptare vetëm që Tahiri të mos dënohet. Hiqet dëshmitari kyç për rrjedhojë nxirret i pafajshëm”, deklaroi Bylykbashi.
Sipas Bylykbashit, prokurorët e kanë marrë mesazhin e Arta Markut dhe do të vihen në rresht për të votuar shumicën që i duhet Ramës në KLP për të propozuar prokurorin e përgjithshëm dhe 10 prokurorët e SPAK.
“Prokurorja e përgjithshme provizore sot është duke dhënë mesazhe të njëpasnjëshme. Shkarkon, transferon në kundërshtim me ligjin pa pasur kompetencë. Për rrjedhojë prokuroria që është një organ i centralizuar, prokurorët e kanë marrë mesazhin: Kjo prokurore të bën gjëmën, të degdis diku, të shkarkon dhe për rrjedhojë bindju se deri sa ti mbarojë afati i përkohshëm që nuk dihet se kur mbaron mund të humbasësh vendin e punës aty ku je. Për rrjedhojë prokurorët do të vihen në rresht dhe do të votojnë ata 6 prokurorë që i duhet Edi Ramës, të paktën 4 prej tyre që i duhen Edi Ramës për të bërë një shumicë në KLP që do të marrë të gjitha vendimet, si: Për të propozuar kandidatin për prokuror të përgjithshëm dhe për të përzgjedhur 10 prokurorët e SPAK.Do të zgjidhen ata prokurorë që i duhen Edi Ramës, do të jenë ata prokurorë që bëjnë hetimin dhe do të mbyllin çështjen duke thënë: Nuk shohim asnjë vepër penale të Edi Ramës, Ministrave të tij, Saimir Tahirit e me rradhë” tha Bylykbashi.
