Teksa ndodhet në Vjenë në takimin informal të ministrave të punëve të jashtme të BE, ministri Ditmir Bushati u shpreh sot se inkurajon vijimin e dialogut Kosovë-Serbi, dhe zbatimin e marrëveshjeve të arritura.
Sipas tij, ky dialog ka nevojë të mbyllet me një marrëveshje, që do të sillte më shumë stabilitet në rajon.
“Diskutimet mes ministrave të jashtëm të BE, përfaqësuesve të lartë të Unionit dhe ministrave të jashtëm të vendeve kandidate, u përqëndruan rreth faktit se forcimi i multilateralizmit efektiv dhe rendit global të bazuar në rregulla, është një nga prioritetet kryesore të Strategjisë Globale të BE-së, dokumenti themelor i strategjisë së BE-së për Politikën e Përbashkët të Jashtme dhe të Sigurisë”, njofton Ministria e Jashtme.
