Bundestagu gjerman miratoi sot me shumicë votash martesën mes personave të të njëjtit seks, vendim ky që konsiderohet si historik për vendin jo pak konservator, si Gjermania.
E gjendur nën presionin e opozitës dhe aleatëve, pak ditë më parë, kancelaria Angela Merkel surprizoi kur pranoi kalimin në parlament të ligjit që lejon martesat e homoseksualëve dhe të lesbikeve.
Ndërsa sot gjatë votimit, Merkel ka votuar kundër këtij ligji. Më pas ajo ka argumentuar votën kundër, duke thënë se: “Për mua, martesa është në thelb një bashkim mes burrit dhe gruas, dhe kështu që unë votova kundër.”
Ky vendim vjen në kundërshtim me qëndrimin tradicional të partive konservatore gjermane CDU dhe CSU, që gjithmonë kanë kundërshtuar këtë ligj.
