Zv/kryetarja dhe kandidate për kryetare të LSI-së, Monika Kryemadhi, nuk ka vonuar të pozicionohet në opozitë.
Në një status të postuar në faqen e saj në FB, Kryemadhi vë në dukje dy prej problematikave më shqetësuese të këtyre ditëve të nxehta në Tiranë dhe jo vetëm, mungesën e dritave dhe të ujit të pijshëm.
Edhe pse e përfaqësuar në qeverinë, mandati zyrtar i së cilës përfundon më 26 shtator, ajo flet për një opozitë të fortë, me energji për të kuptuar dhe ngritur zërin në maksimum për çdo shqetësim të shqiptarëve.
“Mirmëngjes miq! Moti ndryshe nga politika që po ftohet duket se do i nxehë dy ditët në vazhdim. Ndaj kujdes në orët e nxehta të vapës, edhe pse uji dhe dritat mungojë në shumë zona. Ne politikanët i harrojmë ndonjëherë problemet tuaja të përditshme, por ka një zë të fortë që tund dhe shkund apatinë e atyre që kanë marrë përsipër të kujdesen dhe zgjidhin hallet tuaja. Ajo është opozita shqiptare, opozita jonë, e fortë dhe plot me energji për të kuptuar dhe ngritur zërin në maksimum për çdo shqetësim tuajin. Ne jemi me ju, LSI do të jetë pranë problemeve tuaja në çdo ditë apo natë, pavarësisht kushteve të motit apo intrigave të pushtetit”, shkruan ajo.
