Kryeministri i Bullgarisë shprehet se ka rënë dakord me Greqinë dhe Serbinë që të lehtësojnë disa masa lidhur me kufijtë, të vendosura në kuadër të luftës ndaj koronavirusit.
“Ne jemi pajtuar me Greqinë që nga 1 qershori të lejojmë udhëtimin pa karantinë për njerëzit që udhëtojnë për biznes, çështje familjare dhe arsye humanitare”, tha ai para gazetarëve.
Pas një bisede telefonike me liderë grekë, rumunë dhe serbë, Borisov tha se Sofja dhe Beogradi kanë rënë në pajtueshmëri në lidhje me këtë. Kryeministri bullgar tha se shpreson që edhe Rumania t’i bashkohet shpejt iniciativës.
Kujtojmë se Bullgaria i ka mbyllur kufijtë me shumicën e vendeve në mes të muajit mars, si masë për të kufizuar përhapjen e pandemisë në vend.
Ky lehtësim i masave vjen pas raportimit për një ulje të numrit të infektuarve në vend. Ditën e sotme Bullgaria ka regjistruar 24 raste të reja, duke e çuar në 2,259 numrin total të personave të infektuar.
COVID-19 i ka marrë jetën 112 personave në Bullgari.
