Nisin takimet mes ekspertëve në kuadër të dialogut mes Kosovës dhe Serbisë.
Raportohet se nga vjeshta pritet një rritje e dinamikës së procesit të dialogut.
Sot zhvillohet në Bruksel një takim i radhës në nivel ekspertësh në kuadër të dialogut mes Kosovës dhe Serbisë, që ndërmjetësohet nga Bashkimi Evropian.
Nabila Massrali, zëdhënëse e BE-së për Çështjet e Jashtme dhe të Sigurisë, e konfirmoi zhvillimin e këtij takimi, por nuk dha hollësi tjera, shkruan “DW”.
Sipas burimeve të BE-së nga vjeshta pritet një rritje e dinamikës së procesit të dialogut dhe synohet që takime të liderëve të ketë dy herë në muaj dhe që takimet e ekspertëve të zhvillohen çdo javë.
Sidoqoftë përveç gatishmërisë së palëve, kjo gjë varet edhe nga situata e krijuar me masat kundër pandemisë së virusit Corona, nga kufizimet për udhëtime dhe numrin e takimeve me prani fizike në objektet e institucioneve të BE-së.
