Kryeprokurorja e përkohshme, Arta Marku garantoi ambasadorin e Britanisë se po lurton krimin. Arta Marku priti sot ambasadorin e Britanisë së Madhe në Shqipëri, Duncan Norman. Kryeprokurorja deklaroi se do të jetë e vendosur në luftën kundër paligjshmërisë dhe çdo forme të krimit në Shqipëri.
Ambasadori Norman shprehu mbështetjen e Mbretërisë së Bashkuar për Shqipërinë, për bashkëpunimin mes agjencive ligjzbatuese dhe plotësimin e reformës në Drejtësi dhe procesit të “Vetting”-ut.
Takimi me ambasadorin britanik erdhi pas takimit me ambasadorin amerikan Donald Lu dhe ambasadoren e BE-së në Tiranë, Romana Vlahutin.
Arta Marku mori edhe mbështetjen e BE-së një javë më parë, pasi mori atë amerikane në momentin kur ka mbështetjen e plotë të qeverisë Rama. Marku zhvilloi takim me ambasadoren e BE-së në Tiranë, Romana Vlahutin në Prokurorinë e Përgjithshme. Ky ishte takimi i parë i Kryeprokurores Marku me ambasadoren Vlahutin pas marrjes së detyrës. Takimi zgjati rreth 40 minuta dhe u zhvillua me dyer të mbyllura. Ambasadorja Vlahutin nuk ka pranuar që të flasë për median pas takimit.
Që pas marrjes së detyrës së re, Arta Marku ka zhvilluar disa takime me ambasadorët e akredituar në Tiranë. I pari që takoi kryeprokuroren ishte ambasadori i SHBA, Donald Lu, ndërsa më pas ishin përfaqësuesit e vendeve të BE. SHBA dhe BE vijojnë mbështetjen për institucionet e drejtësisë shqiptare për zbatimin e reformës në sistemin e drejtësisë.
Takimi me Vlahutin vjen ndërkohë që në radhë e Prokurorive, Marku ka bërë një sërë lëvizjesh, të cilat kanë shkaktuar edhe përplasje, si në rastin e kryeprokurorit të Elbasanit.
Më herët kryeprokurorja A Marku ka zhvilluar sot një takim tek Ministria e Brendshme me ministrin Fatmir Xhafaj. Në takim ishin të pranishëm dhe Ministrja e Drejtësisë Etilda Gjonaj, Ministri i Financave dhe Ekonomisë Arben Ahmetaj, Zv.drejtor i Shërbimit Informativ Shtetëror Helidon Bendo, Drejtori i Përgjithshëm i Komanduar i Policisë së Shtetit Rebani Jaupaj dhe Drejtori i SHÇBA-së Eduart Merkaj.
Në Ministrinë e Brendshme u zhvillua mbledhja e Task Forcës Qendrore Ndërinstitucionale në kuadër të planit të veprimit kundër krimit të organizuar, operacionit – ‘Forca e Ligjit’.
