Varianti i ri i koronavirusit ka pushtuar Britaninë e Madhe. Në 24 orët e fundit, janë shënuar 1.610 viktima, shifra më e lartë ditore që nga fillimi i pandemisë.
Numri i të vdekurve sot shënon një rritje 30 për qind nga 1,243 vdekje të raportuara javën e kaluar. Ndërkohë, u raportuan 33,355 raste të reja me koronavirus. Pavarësisht kufizimeve dhe bllokimit të Britanisë së Madhe shifrat vijojnë të jenë të larta.
Kjo është hera e tretë brenda një muaji që Britania ka regjistruar një numër rekord të viktimave ditore, ndërsa kombi lufton me llojin super-infektiv të Kentit dhe spitalet janë mbingarkuar.
Disa javë më parë, kryeministri britanik, Boris Johnson deklaroi se vendi do të futej në karantinë për herë të tretë, si pasojë e rritjes së madhe të numrit të të infektuarve dhe vikimave nga Covid-19.
Nën masat aktuale të izolimit, banorët duhet të qëndrojnë në shtëpi dhe të dalin vetëm për arsye të domosdoshme. Aty përfshihet blerja e ushqimit, ushtrimet apo puna, nëse nuk mund të kryhet nga shtëpia. Izolimi do të zgjasë deri më 15 shkurt.
Në Britani, u shfaq një variant i ri i koronavirusit, i cili besohet të jetë 70% më ngjitës dhe ka vënë në alarm të gjithë botën, pasi është përhapur në shumë shtete.
